Мектепке чейинки билим берүү уюмунда баланын өнүгүүсүн изилдөө боюнча улуттук инструмент

Биздин изилдөө балдардын мектепке чейинки билим берүү мекемелериндеги (МЧББУ) өнүгүүсүн түшүнүүгө жана жакшыртууга багытталган. 

            Мектепке чейинки курак - бул баланын жашоосундагы эң маанилүү этаптардын бири. Бул куракта интеллектуалдык, социалдык, эмоционалдык, когнитивдик жана физикалык өнүгүүнүн негизги көндүмдөрү жана негиздери калыптанат. Ошондуктан, мектепке чейинки курактагы балдардын өнүгүүсүн баалоо алардын келечектеги ийгилигин аныктоодо маанилүү ролду ойнойт. Биздин изилдөө балдардын өнүгүүсүн жакшыртуу боюнча багыттарды жана эң жакшы шарттарды камсыз кылууда кандай кошумча ресурстар жана колдоолор керек экендигин аныктоого жардам берет. Биздин жыйынтыктар балдардын жана алардын үй-бүлөлөрүнүн муктаждыктарын мүмкүн болушунча канааттандыруу үчүн мектепке чейинки билим берүү программаларын иштеп чыгуу жана өркүндөтүү үчүн колдонулат.

          “Эрте өнүгүүнү баалоо инструменти” (ЭӨБИ) баланын өнүгүү картасын; аны толтуруу боюнча колдонмону; МЧББУнун педагогдору, жетекчилери жана ата-энелер үчүн анкеталарды; баалоо үчүн колдонулуучу материалдардын жана ресурстардын чек-баракчасын камтыйт. Инструмент Дүйнөлүк банктын финансылык колдоосу менен ишке ашырылып жаткан Кыргыз Республикасынын Билим берүү жана илим министрлигинин “Келечек үчүн билим берүү” долбоорунун алкагында иштелип чыкты.

           Изилдөөнүн максаты - баланын эрте өнүгүүсүнүн сапаты жөнүндө объективдүү маалыматтарды чогултуу. Өлчөө жеке деңгээлде жүргүзүлөт, башкача айтканда, ар бир баланын деңгээли бааланат. Бирок, инструменттин жардамы менен чогултулган жалпыланган маалыматтарды айрым МЧББУнун жана балдарды эрте өнүктүрүү,  мектепке чейинки билим берүү системасынын ишин талдоо үчүн колдонсо болот.

                   Биздин изилдөөгө катышканыңыз үчүн ыраазычылык билдиребиз!